Advertisement
සාහිත්‍ය රස වින්දන ලිපි පසෙක ලා මම අද ලිවීමට සූදානම් වෙන්නේ රෙද්ද හැට්ට ගැන හෙවත් ශ්‍රී ලාංකීය ස්ත්‍රීයගේ ඇඳුම ගැනය.
මන්ද සාහිත්‍ය රස විදීමට සුදුසු වට පිටාවක් ඇති කිරීමට පෙර අප සමාජයේ නිදහසේ ජීවත් වීමට වට පිටාවක් නිර්මාණය කල යුතු බැවිණි.
ශ්‍රී ලංකාව කොපමණ ආර්ථික වර්ධනයක් පෙන්වා දියුණු සමාජයක පෙර මග ලකුණු පෙන්වූවත් , කාන්තාව හා ඇගේ හැසිරීම සම්බන්ධයෙන් මෙහි පවතින ආකල්ප තවමත් ඉතා නොදියුණු මට්ටමක පවතී.
එහිදී ස්ත්‍රීය අදින වස්ත්‍රය පිළිබද කතිකාවක් ඇතිවීම යෝග්‍යය.
තවමත් ශ්‍රී ලාංකික කාන්තාවන්ට වස්ත්‍ර තෝරා දෙන්නේ පිරිමින්ය. මා එසේ පවසන්නේ ඔවුන්ගේ තේරීම රඳා පවතින්නේ පුරුෂයන්ගේ ආකල්ප මත බැවිණි.
බුරිය පෙනුනත් පිට ඇරුනත් සාරිය නිතරම අඳින්නේ නියම ගෑණුන්ය, රහත් වීමට උදව් වන්නේ ඔවුන්ය. මැතිවරණ කාලයට කපටි අම්මණ්ඩිලාත් සාරි අඳිති. එසේ නැතිනම් දිග අත් ඇති හෝ බෝරිච්චි අත් ඇති හැට්ට සමඟ දිග රැළි සාය අඳින්නේ දිව්‍යාංගනාවන්ය, සුළු වරදක් කල කන්‍යාවන්ය.
මේ දෙකටම නැති තද හිර ජීන්ස්, කොට කලිසම්, අත් නැති හැට්ට , කෙටි සායවල් අඳින හැම ගෑනියක්ම එක දිනක් හෝ පාරේ තොටේදී " අන්න බඩුවක් " "වේසියක්" බවට පත්ව ඇත. මන්ද , ඉහත කී සියලු ඇඳුම් , පුරුෂ මූලික සමාජයේ ගැනෙන්නේ "සංස්කෘතියට" එරෙහි ආයුධ ලෙසකිනි.
ශ්‍රී ලාංකීය පොදු පුරුෂයා මේ වෙනුවෙන් ඉදිරිපත් කරන තර්ක විතර්ක අපමණය. එයින්ම මෙය බරපතල ප්‍රශ්නයක් බව අපට හැඟේ!
පළමුවන තර්කය : " ලංකාවේ ගෑනු අඳින්න ඕනේ ලංකාවට ගැලපෙන විදිහට, අපි සුද්දෝ නෙමෙයිනේ, අපිට සංස්කෘතියක් තියෙනව"
පුදුමයකට මෙන් සුද්දන්ගේ කලිසම් හැඳ ටයි කෝට් පළදින මහත්වරුන්ගේ සිට පිටරට නිරූපිකාවන්ගේ අඩ නිරුවත් පින්තූර බිත්තියේ එල්ලාගෙන සිහින මවන අයියලා මල්ලිලා බොහොමයක් ද එසේ පවසති. අඳින්නා කෙසේ ඇන්දත් බලන්නා සිහි බුද්ධියෙන් බැලිය යුතු නොවේද? එසේ නැතිනම් අඳින්නා කෙසේ ඇන්දත් බලන්නෝ සහ ගුණදොස් කියන්නෝ අපට අවශ්‍යයද?
මේ මගේ ශරීරයයි , මේ මාගේ ඇඳුමයි. මා ඇසුවොත් පමණක් ඔබ දෙන ගුණදොස් ඉතා වටිනේය!
දෙවන තර්කය: " ඔහොම ඇන්දොත් දූෂණය වෙන එක අහන්නත් දෙයක්ද ?"
බුරිය දැක්කත් , දණිස් පොල් කටු දැක්කත්, තන පටිය දැක්කත්, ජංගිය දැක්කත්, මොකුත්ම නොදැක්කත් , කාන්තාවන්ගේ හුස්ම වැටුණත් නොවැටුණත් , ඉතා පහසුවෙන් වින්දනයක් ලබන බහුතර ලිංගික පීඩනයෙන් පෙළෙන අප සමාජයේ පොදු පුරුෂයා , මේ තර්කය ඉදිරිපත් කරන්නේ දූෂණයට ලක් වූ කාන්තාවන්ට සහනයක් වීමට නොව අනුන්ට වැරැද්ද දමා තම වර්ගයේ නම්බුව බේරා ගැනීමටය.
මෙහිදී අප තේරුම් ගත යුත්තේ සංස්කෘතිය යන වචනය බොහෝ විට කාන්තාවන් අපහසු තාවයට පත් කරන බවකි. එම වචනය තුල කාන්තාවන්ගේ නිදහස , තෝරා ගැනීමේ අයිතිය ඇහැරී ඇති බවකි.
අරාබියේ කාන්තාව සිරුරම ආවරණය කරගෙන සිටින විට , ස්වාසි ලන්තයේ අඩ නිරුවතින් සිටීමට නියෝග ලැබේ. ඒ අතර සුදු හම ඇති කාන්තාව අරගල කර සම්පූර්ණ නිරුවතින් මුහුදු වෙරළේද සිටී. අප සිටිය යුත්තේ බාගයට, තුන් කාලට පාරේ ඉන්න අයියලාට ඕනා ලෙස වසාගෙනය.
උපන් දා සිට සිරි ලක කාන්තාවගේ ජීවිතය, සංස්කෘතිය නැමති යදම් වලට හිර කරන්නේ එම මුග්ධ සමාජයයි. දෙමව්පියන් , පෙම්වතුන් , ස්වාමි පුරුෂයන් බිය වන්නේ ඔබගේ කර පළල හැට්ටයට හෝ ඔබගේ මිනි ගවුමට නොවේ , ඔවුන් බිය වන්නේ කොපමණ අපහසුතාවයට පත් වූවත් සමාජය විසින් තාවකාලික ලෙස සම්මත කර ගත් සංස්කෘතික බහු බූත වලට එරෙහි වීමටය.
සම්පූර්ණයෙන් ඇරියත් වැසුවත්, බාගයට ඇන්දත් එහි කිසිත් වැදගත් කමක් නැත. වැදගත් වන්නේ එය තෝරා ගැනීමට ඇති අයිතියයි.
උෂ්ණාධික දිනෙක කොටට අඳින්නත්, සීතල දිනෙක දිගට අදින්නත්, උත්සවයකට කැමති විලාසිතාවකින් සැරසී යාමටත් , මුහුදු වෙරලේදී නාන අදුමක් නිදහසේ අදින්නත් යන ඉතා සරල අවශ්‍යතා, මානසික පීඩනයකින් තොරව රිසි ලෙස ඉටු කර ගත නොහැකිනම් නම් ඒ සමාජය කාන්තාවන්ට තවත් එක් අපායක් නොවේද?
සම තැන ලැබීමට , සම වැටුප් ලැබීමට බොහෝ දුරින් සිටින නිසා පළමුව , කට වහරින් පවසන ලෙස " රෙද්ද" ගැන වැඩි වැඩියෙන් කතා කල යුත්තේ මේ නිසා නොවේද?
By Jahooli Devi
PS: විනෝදය සඳහා
ගායනය : ඇන්ටන් ජෝන්ස්
සල්ලි දීල ගවුම මැහුවෙ ඇඳගෙන යන්න
අල්ලි දෙකක් වත් දුර බැහැ අඩිය තියන්න
ඇඟට හිරට මහල කොටට ඇඳල බලන්න
අඳින්න මිනි ගවුම අඳින්න
අඳින්න මිනි ගවුම අඳින්න
ලීලී මාගෙ නෝන එයා මෙහෙම කියන්නෙ
දැන් රටේ තොටේ කවුරුත් මිනි ගවුම් අඳින්නෙ
මම කොහොමද සාරි ඇඳන් මහ මග යන්නෙ
මටත් ගවුමක් ඔනෙ ඔව් මිනි ගවුමක් ඕනෙ
මිනි ගවුමක් මොටද දැන්ම ඔයා සොයන්නෙ
ඇයිද ලිලී මගෙ පපුවට ගින්දර දෙන්නෙ
මිනි ගවුම් අඳින්නේ මැරුණට පසුනෙ දෙවියනේ
මෙහෙම කිවුව ගමන් නෝනා මගෙ ඇඟට ගොඩවුනේ
අපේ නෝනගෙ වැඩ පුදුමයි මට දැන් සිහිවෙනවා
මැරුණෙ නැතුවම නෝන මිනි ගවුම් සොයනව
බෑ කියන්නටත් ලෝබයි අඬ අඬ ඉල්ලනවා
මිනි පෙට්ටි කඩෙන් මිනි ගවුමක් මෙ මං ඉල්ලුවා
මිනි ගවුමක් සමග මිනි පෙට්ටියකුත් දුන්නා
කාර් එකකුත් ලැබුණා ඒකෙම මමත් ගොඩ උනා
ගේ ළඟටම එන්නා වට පිට සෙනග පිරෙන්නා
එය දුටු මගෙ නෝනා මරහඬ දීගෙන පැන්නා
මොකද දෙවියනේ ඔයාට වෙලා තියෙන්නේ
මිනි පෙට්ටි මොටද ඇයි අද අපෙ කවුරුද මැරුණෙ
එය ඇසුණු මගේ ඇඟේ මාලු ග‍ඟේ නටන්නෙ
අපේ නෝනට මම මේ විදියට උත්තර දුන්නෙ
මිනිගවුමක් දෙන්නෙ මිනි පෙට්ටියක් ගත්තම
ගත්ත නිසයි ලිලී මම ගෙනාව දෙකම
මිනි ගවුම කිව්වෙ කොට්ට උරය වගෙ කොට ගවුම
නෝන කිව්ව එහෙම මට තේරුණ කරපු ගොන්කම
සල්ලි දීල ගවුම මැහුවෙ ඇඳගෙන යන්න
අල්ලි දෙකක් වත් දුර බැහැ අඩිය තියන්න
ඇඟට හිරට මහල කොටට ඇඳල බලන්න
අඳින්න මිනි ගවුම අඳින්න
අඳින්න මිනි ගවුම අඳින්න
අඳින්න මිනි ගවුම අඳින්න
No comments:
Post a Comment